Би тэнэх дуртай хүн
Бишгүй олон уул усыг үзэж
Бичигдээгүй шүлэг болсон зам харгуйг уншиж
Би аялан жуулчлах дуртай
Үй олон хүн зонтой нүүр учирч,
Үйлдвэр завод, хот сууринг үзэж,
Үхэгсдийн үгийг сонсож, төрөгсдөд нэр өгч
Үлгэр туульст итгэж явах дуртай
Хааны хувцаснаас, боолын хуулга хүртэл
Харагдсан бүхнийг өмсөхийг би хүсдэг.
Хашралгүй дахин дахин дурлаж
Хайр даах бүсгүйг хайрлахыг би хүсдэг.
Амттан бүхнийг идэхийг би хүсдэг.
Архи ууж, тамхи татаж, дуулахыг би хүсдэг
Айхтар их баярлаж, дэвхцэхийг би хүсдэг.
Ан агнаж, байшин барьж, найрлахыг би хүсдэг.
Хэрвээ би, энэ бүхэндээ дургүй болох юм бол
Хэн хүнд бас хэрэггүй болж байгаа нь тэр
Р.Чойном
November 30, 2009
Subscribe to:
Post Comments (Atom)
No comments:
Post a Comment